科大天文新生入學指南 2023
大家入黎睇呢頁肯定係對天文有興趣， 又或想了解天文係乜野啦！ 其實了解天文可以好簡單， 入到科大夜晚抬頭睇天都可以欣賞星辰之美。 識睇星嘅， 痴住我地就繼續有好多機會睇星架喇～ 仲可以識倒更多志同道合嘅人一齊享受星空！ 唔識睇星嘅都唔緊要， 入我地學會， 我地教你睇星， 帶你進入天文嘅世界！
認識我地之前， 梗係要認識吓科大先啦！ 即刻轆落去睇吓我地最全面既入學攻略先啦～
1. 學會簡介
香港科技大學學生會天文學會喺1993年成立， 至今已經有31年歷史喇～ 我地係科大入面嘅興趣學會 （Independent Club）， 為一眾對天文、對喺科大睇星有興趣嘅同學仔提供一個平台，了解天文之餘又可以互相交流識多幾個朋友。最重要最重要嘅係～ 我地有自己嘅天文設備，保證帶俾大家最高質嘅觀星體驗！
好多人都覺得天文相關嘅活動好學術、好單調，但係其實我地科大天文嘅活動唔淨只係喺UST觀星； 除左唔同嘅gathering，camp之外，我地都會喺平時嘅觀星活動入面教大家點樣拍攝浩瀚嘅星空，仲會有境外嘅觀星團添！ 挽我地嘅活動、做我地嘅member就唔會錯過我地精彩嘅資訊架喇！
2. 交通篇
科大無地鐵直到好麻煩？ Nonono！！！ 正所謂條條大路通科大，下面列曬科大同學仔平時常用嘅番學方法， 保證有你滿意嘅方法。
i. 彩虹
小巴
好多同學仔都會喺彩虹搭車入科大， 夠曬方便呀嘛！
11號小巴 (彩虹站 →科大[北] →坑口站):
服務時間: 05:20 - 23:50
班次: 5 - 15 mins
車程: 約15 mins
車費: $8.1
፠平日番學時候嘅人龍好長架， 有心理準備要等兩至三架小巴先上倒， 唔想遲到就記得早啲出門口喇～ 喺彩虹地鐵站C1出口轉左上到地面再U Turn 就係。
11S號通宵小巴 (彩虹站 →科大[北] →坑口 →寶琳站):
服務時間: 00:00 - 05:00
班次:15 - 50 mins
車程: 約15 mins
車費: $9.8
巴士
彩虹地鐵站C1出口右轉就係架喇～
91巴士 (鑽石山站 →彩虹站 →科大[北]):
服務時間: 06:00 - 22:25
班次: 20 - 25 mins
車程: 約 20 - 30 mins
車費: $8.1
91M巴士 (鑽石山站 →彩虹站 →科大[北] →寶琳站):
服務時間: 06:00 - 00:10
班次: 12 - 25 mins
車程: 約 15 - 25 mins
車費: $6.8
91P巴士 (鑽石山站 →彩虹站 →科大[北]):
፠朝早特別車
服務時間: 07:50 - 08:50
班次(鑽石山): 07: 50 ；08:05 ；08:15 ；08:30 ；08:50
፠由鑽石山去彩虹大約要5 mins
車程: 約 12 - 20 mins
車費: $6.8
ii. 鑽石山
通常唔建議喺鑽石山上車； 除非你喺嗰頭住啦～ 因為巴士喺鑽石山兜出去彩虹都幾耐吓架，寧願搭多個站去彩虹。
巴士
91巴士 (鑽石山站 →彩虹站 →科大[北]):
服務時間: 06:00 - 22:25
班次: 20 - 25 mins
車程: 約 25-35 mins
車費: $8.1
91M巴士 (鑽石山站 →彩虹站 →科大[北] →寶琳站):
服務時間: 06:00 - 00:10
班次: 12 - 25 mins
車程: 約 25-35 mins
車費: $6.8
91P巴士 (鑽石山站 →彩虹站 →科大[北]):
፠朝早特別車
服務時間: 07:55 - 08:50
班次(鑽石山): 07: 55 ； 08:05 ； 08:15 ； 08:30 ； 08:50
፠由鑽石山去彩虹大約要5 mins
車程: 約 12 - 25 mins
車費: $6.8
iii.坑口
由坑口去科大比較方便， 所以住港島區嘅同學多數都會喺度搭車。
小巴
11號小巴 (坑口站 →科大[南] →彩虹站):
服務時間: 05:20 - 23:50
班次: 5 - 15 mins
車程: 約 10 mins
車費: $8.1
11M 號小巴 (坑口站 →科大[北]):
服務時間: 06:00 - 24:00
班次: 6- 10 mins
車程: 約 10 mins
車費: $6
iv. 寶琳
雖然寶琳同樣都有小巴同巴士，但通常入科大都會去坑口，因為坑口早一個站～巴士
91M巴士 (寶琳站 →科大[南] →彩虹站 →鑽石山站):
服務時間: 05:40 - 23:50
班次: 12 - 20 mins
車程: 約 30 mins
車費: $6.8
小巴
12號小巴 (寶琳站 →科大[北] →西貢碼頭):
服務時間: 05:40 - 22:25
班次: 10 - 15 mins
車程: 約 30 mins
車費: 分段收費$7.7 (上車後俾錢前要同司機講去科大， 如果唔係就要俾曬全程嘅錢架喇～)
11S號小巴 (寶琳站 →坑口站 →科大[北] →彩虹站):
服務時間: 00:00 - 05:00
班次: 15 - 50 mins
車程: 約 15 mins
車費: $9.8
v.牛頭角
小巴
呢架係一架循環線小巴， 起點同終點都係科大， 經觀塘去牛頭角地鐵站附近， 如果住呢頭就唔洗特登去彩虹喇～
104號小巴 (科大[南] ↔ 牛頭角):
服務時間: 06:25 - 21:00
班次: 12 - 25 mins
車程: 約 30 mins
車費: $8.3
vi. 調景嶺 + 將軍澳
巴士
792M巴士 (將軍澳站 →調景嶺站 →坑口[北] →科大[北] →西貢):
服務時間: 06:30 - 23:00
班次: 15 - 25 mins
車程: 約 30 mins
車費: $8.7
vii. 西貢
如果你住得比較偏遠， 又或者心血來潮想同班fd入西貢行下山， 喺科大出黎絕對唔遠！
巴士
792M巴士 (西貢 →科大[北] →坑口[北] →調景嶺站 →將軍澳站):
服務時間: 06:30 - 23:45
班次: 15 - 25 mins
車程: 約 30 mins
車費: $8.7
小巴
12號小巴 (西貢碼頭 →科大[北] →寶琳站):
服務時間: 06:20 - 23:15
班次: 10 - 15 mins
車程: 約 30 mins
車費: 分段收費$7.7 (上車後俾錢前要同司機講去科大， 如果唔係就要俾曬全程嘅錢～～)
科大南閘
如果由科大落去彩虹 / 牛頭角 / 鑽石山都會喺南閘上車
由牛頭角 / 寶琳 / 清水灣 / 坑口上車上黎科大就會喺呢度落車
科大北閘
如果由科大落去坑口 / 寶琳 / 將軍澳 / 西貢會喺北閘上車
除左104小巴 / 91M / 91巴士 (開往鑽石山站) / 11S小巴外，其餘所有巴士同小巴都會喺呢度落車
3. 飲食篇
唔講你唔知，科大話曬都係全港第二大嘅大學，要搵野食容不易？！就等我地科大天文為大家呈獻足本嘅飲食指南啦 ～
南北小廚
南北小廚係科大唯一嘅酒樓，由美心集團經營，提供各式點心。味道唔錯，對比起其他canteen略貴，個人經驗一餐大約$60到$70，但都係平過喺出面飲茶，適合一大班人REU。
星期一至四開放時間為11:30－21:00。星期五及星期六為11:30－22:00。而星期日及公眾假期為10:30－22:00。
LG1 Canteen
位於LG1，都係由美心集團經營， 價錢都算平，比LG7 貴少少啦， 比較受歡迎嘅係燒味飯同早餐。 地方好大， 今年翻新完有好多好野食啊！
開放時間為07:30－19:30。
LG5 McDonald’s
M記，你懂的。科大係唯一一間有M記嘅大學， 同出面唔同嘅係呢度大部份正價套餐都有9 折。
開放時間為07:00－ 24:00。
LG7 Canteen
LG7係科大最大嘅canteen。有AsiaPacific Catering (大家樂)、金飯碗 (金兜)、Super Sandwiches 同埋TT Veggies四間食肆俾大家選擇，大家樂同金兜嘅開放時間為07:30－19:30， 而TT Veggies正如其名，係一間齋堂，開放時間為11:00－19:30。想食齋嘅同學可以去試下，都唔錯架。
AsiaPacific Catering (大家樂)
AsiaPacific Catering 嘅早餐同下午茶絕對係科大飲食首選: 夠抵，夠飽，夠好味！ 下午茶時段由2:30開始， 特別推介烤脾西多， 再加個通粉都係多$3 喳。
星期一至六開放時間為07:30－19:30， 而星期日及公眾假期就為09:00－19:30。
金飯碗 (金兜)
金飯碗唔提供下午茶， 但最近9點半前係有早餐食嘅，午餐同晚餐嘅廚師推介就好有驚喜。 雖然唔少科大人都唔會揀金兜. . . 遲啲你就明。
星期一至六開放時間為07:30－19:30， 而星期日及公眾假期就為09:00－19:30。
Subway
喺鄭裕彤大樓地下嘅Subway，平時同學仔唔太肚餓，又或者啱啱做完運動都會黎呢度買包包. . . 食。 佢仲有每日一款$27 嘅包架～ 夠曬抵呀！不過啲員工唔係好識中文，要用英文點餐佢地先明。以小編經驗，其實大家都係指番要乜要物，同啲佢地講：「This， this， this」 啫XD
LSK Canteen
位於李兆基大樓內，類似LG1 Canteen，有售咖啡、三文治、各式快餐同燒味，但味道一般， 而且LSK 離其他main buildings 都比較遠， 因而主要顧客都係喺LSK 上堂嘅商學院學生， 不過呢度比較新同埋周圍景觀唔錯， 都吸引到一大班fans 係度食。
開放時間為星期一至五07:30－21:00。(翻新中)
Ebeneezer's (清真)
一間位於李兆基大樓嘅中東式餐廳，另設鋪位於LTA 對面露天位置，食物無論肉質到配料都有正宗中東式嘅味道， 絕對不妨一試。 餐廳主打土耳其卡巴、 印度咖哩同薄餅。 店內不設坐位， 買完可以去隔黎LSK Canteen享用。 另外由於店員都係外國人， 你可能需要同佢地講英文。
Seafront Canteen
科大人都會叫佢Seafront。由於科大嘅宿舍同Atrium、北閘及南閘都相距甚遠，位於本科生宿舍六座(UG Hall VI)樓下嘅Canteen就成了一眾科大hall友嘅落腳點。 Seafront有兩個賣點，第一個係平，除咗碟頭飯同車仔麵，最好味同抵食就係呢度嘅多士同糖水，只係$9！第二個賣點係宵夜，平日由晚上六點開放到凌晨兩點，全科大12點後就只有Seafront有野食，夜晚肚餓就一定會去呢度！
Starbucks
位於Atrium嘅商務書店隔黎， 由北閘行到去火雞左手邊一眼望到。 呢度賣嘅野同出面嘅Starbucks 無咩唔同， 但你會成日都見到Starbucks 門口排曬長龍， 點解？ 因為出示科大學生證買野飲野食有7 折優惠， 抵到爛呀！ 尤其是上朝早堂之前買番杯咖啡就最啱喇～
UC Bistro
位於盧家聰大學中心， 係Uni-Bar 後面， 唔駛問，佢一定係全科大最貴嘅餐廳， 主要顧客係教職員同遊客。
開放時間為11:00－21:30。
Uni Bar
位於偷情小徑盡頭， 係大學入面唯一嘅酒吧， 提供各款酒精飲品。
開放時間為12:00－23:00。
-->
4. 設施篇
科大有咩野睇有咩野挽？ 唔洗自己周圍行去歷險嘅～ 睇下面嘅指南， 幫你喺最短時間內知曬有咩常用設施仲好啦！
科大地標
科大熱門景點，唔識真係唔好同人講你讀緊科大呀～(講笑啫講笑啫)
火雞
科大最有代表性嘅地標， 因為個樣似火雞所以有個咁嘅名，事實上佢係一個真係用得嘅日晷黎嘅，不過有無人真係用黎睇時間呢. . . 見仁見智啦！小編就會選擇睇鐘喇～
Atrium
科大嘅心臟地帶， 無論你去上堂定食飯都一定會行過。間唔中會有活動喺呢度舉行，得閒跟埋一齊熱鬧吓啦！
順帶一提， Atrium頂部嘅設計唔係完全密封，每一次落雨天都會漏水，所以最好都係攞番把遮呀！ 美感呢家野，總係要有犠牲嘅～
Concourse
基本上去上堂或者去南閘都會經過呢度，撞正轉堂時間真係同動物大遷徙一樣咁震撼，所以部份同學仔就會選擇兜課室 (Skywalk)，廢時遲到啦～
我地科大天文就黎有活動嗰陣都會喺度擺counter 收parti 架～ 黎搵我地啦！
智慧石
路中間一舊四四方方嘅野，不過而家上面會有好多花阻住你。傳說如果你可以一野跳過左佢，就可以過3爆4；但踩到佢就會爛GPA。信不信由你，反正我信了。不過安全至上，大家量力而為啦～
偷情小徑
呢條偷情小徑係行去Uni-Bar同LSK嘅一條捷徑，據聞以前好多人係呢度偷情，貪佢左右有樹夠隱蔽喎～不過小編我呢. . .咪傻啦，咁多蚊我先唔會喺度偷情呀！
天一泉
佢實際上係一個噴水池，位於LG7 Canteen出面，平時係睇心情噴水嘅，所以無人可以預測佢幾時噴水。
呢度最多嘅就係鬼故，想聽最詳細最真實感受嘅鬼故？咁就事不疑遲，黎報我地嘅O’camp啦！
蚊池
Hall 6 對出有一個好大嘅水池，唔好以為跳左落去上番黎就叫出左pool先得架. . . 不過可以肯定嘅係啲水都真係幾污濁，多唔多蚊就見仁見智喇。
蘑菇
蘑菇？食得架？科大嘅蘑菇由Atrium望埋去真係似蘑菇架，只不過佢唔食得啫！其實佢係一個觀景台黎嘅，呢度望出去仲可以飽覽成個牛尾海添！喺拉把溫書溫到攰出黎抖下又得，夜晚黎呢度賞下月亦得，得左～ (科大用語“跳蘑菇”就係指呢度)我地科大天文有陣時都會喺呢度開鏡睇星。
其他主要設施
圖書館 (拉把)
科大人又稱拉把，成日聽到人講「摺拉」就即係去圖書館自摺喇。拉把總共有五層，平時等轉堂入去涼下冷氣都咪話唔爽呀！
而Learning Commons就喺拉把嘅LG1，入面有好多房仔 (LC)，可以容納7至10 人；開會、做功課、溫書團、做project一流！不過要注意返，LC房好受歡迎，預先book左就唔會搵唔到空嘅LC房喇。 LC呢一層係喺考試期間仲係24 小時開放架！
Barn B
喺Concourse入口嘅右面，有一間好多電腦嘅房。同學仔平時都鍾意喺度print notes，印完順路去上堂。呢度係用print budget黎俾錢嘅，一開始會有$120 print budget送俾你，用曬先再入科大卡，唔好咁蠢蠢豬唔用print budget喇！
ATM機
UST主要嘅ATM機位於Barn B同銀行隔黎，方便學生撳錢。
鄭裕彤樓 (CYT)
呢個係岩岩新起好嘅大樓，入面有LT-L，各種Lab同埋課室，新生認住呢度喇，reg day嗰日會喺LT-L做學生證！！
順帶一提，張學生相影好啲，因為佢會跟足你幾年，唔好以為報失就可以影過張靚靚嘅，科技大學嘅科技你懂的. . . 影得唔好就GG架喇！
李兆基商學大樓 (LSK)
專係俾Busi學生用嘅地方，入面好新架，仲有人話去廁所辦事一定要去呢度，貪佢夠新夠乾淨喎(失禮曬XD)！不過呢度距離Atrium比較遠，預番多少少時間行過去呀！
書店 (商務)
位於Atrium lift 3 隔黎，想做文青？唔洗諗喇，行入去啦！教科書都可以係度買架～
銀行 (中銀，恆生)
位於Atrium life 2嘅右手邊，以後急住用錢唔洗周圍問人借住先，交學費都唔洗周圍撲啦！
紀念品中心
喺正中銀隔黎，平時會有好多T-shirt呀、鎖匙扣呢啲紀念品賣；不過講到最受歡迎嘅就係梗係印住HKUST嘅hoodie啦～間唔中過時過節仲有discount，搞到賣斷市添！
診所
喺Sport Hall對面嘅LG1診所，科大人皆曰：「獸醫」，平時同學仔唔舒服都可以黎呢度，唔洗錢架！不過有無效就. . . 唔敢擔保喇～
入到去要俾你張學生證佢地登記先，見完醫生要記得拎埋嗰張「醫生紙」交去攞藥個櫃台度，如果唔係就坐喺度白等架喇！
牙科診所
喺診所對面嘅就係牙醫。科大係真係乜都有架，滿足曬同學嘅日常所需。
佢有一年一次幫同學免費check牙嘅服務，要預約架！三分鐘搞掂XD～另外喺呢度洗牙只要$70，有興趣可以試吓！
Megahair
認真咩？！科大連頭髮都有得剪？無錯！小編我都話左科大真係乜都有架啦，不過記得去剪頭髮之前要預約架！想喺重要日子之前剪番個靚頭就去呢度啦！
Students’ Union CO-OP Shop
位於LG5麥記出面，平時所需嘅文具、畫紙甚或係手機配件都可以喺呢度買倒，學生會會員仲有9 折添！
平時就開9:00 嘅， 星期六日同公眾假期都唔開架～
Fusion (百佳)
喺LG7canteen隔黎，日常用品都可以喺入面買到，出示學生證仲係有95 折架～
音樂室
位於LG4 Common 1 + 2入面， 俾大家發揮音樂潛能。呢度唔只有鋼琴，仲有band房架！
BBQ場
科大兩個BBQ場都係喺海邊，一路BBQ，一路睇海景，夜晚仲可以睇埋星，都咪話唔爽呀！
運動場所
Sport Hall
Lift 6直落LG1就係S.H.Ho Sport Hall，平時呢度有人打籃球同羽毛球，考試嗰陣作為考場
Gym Room
喺Lift 6直落LG4嘅呢個Gym Room完全可以滿足鍾意健身嘅同學仔，平時入去係唔洗俾錢架！
不過提提大家， 下晝4至5點都係高峰時期，唔想同人爭就盡量避開繁忙時間喇～
壁球場
喺Gym room隔黎嘅壁球場除左可以打壁球之外，有時仲會開張枱俾人打乒乓波架～
攀石場
Gym room嘅對面就係攀石場喇，鍾意挑戰自己嘅同學仔唔係唔試呀嘛？
Artificial-turf Soccer Pitch (ASP)
呢個喺Hall下面嘅足球場上幾年番新完，係科大唯一一個草地足球場黎架～不過普通人平時都幾難book場吓。
Seafront籃球場
ASP再落少少就係Seafront籃球場，平時如果無人book場嘅話會開放俾學生自由用；不過呢度附近無水機，記得帶夠水先好黎呀！
Seafront小型足球場
喺正籃球場隔黎，一樣啦，平時如果無人book場嘅話就會開放俾學生自由使用。
室內、室外游泳池
喺Hall下面嘅泳池，一個室外一個室內。兩個泳池雖然好近，但其實係分開架！
南閘網球場
科大近南閘位置就設有網球場，落左堂無野做想做下運動？想同朋友仔打下吓波？唔洗等喇！快啲去book場啦！
Hall 9 Gym room
科大男仔又做gym，女仔又做gym，Gym room又點會得一間呢？喺hall 9就有另一個喇！雖然佢離學術樓遠啲同埋細啲，不過勝在唔洗等呀嘛～
School common
Sci Home
喺concourse中間嘅左手面，係讀science同學嘅聚腳點，夏天有冷氣涼，間唔中仲會有course嘅tutor喺度俾同學仔問問題。
E^2 I
喺concourse 二樓，係engine同學嘅聚腳點，讀法係”E square I”。 做project? E^2 I啦！當然，呢度都有學術意見啦～
ITSC account
幾乎所有科大網上服務(print野、內聯myPortal、wifi等)都係用呢個Account。第一次使用嘅話需要喺以下網頁做activation架。
傳送門（網頁）： http://itsc.ust.hk/services/general-it-services/user-account/student-account/
Wifi及有線網絡
科大人基本上都係用wifi上網，夠曬方便！主要用嘅wifi係eduroam。
Wifi:
Eduroam，直接用ITSC Account登入就得，但科大人對佢嘅連線質素就頗有微言喇～
如果係街度又咁啱冇數據上網? 其實係可以用Universities via CSL/Universities via Y5ZONE架! 登入時用你嘅ITSC後面加@ust.hk，密碼用ITSC account嘅密碼，就可以用架喇。
有線網絡:
所有hall都會有有線網絡插頭，如果想有穩定嘅network黎打機，可以自備網線接駁電腦，之後根據網頁指示configue個網絡就ok喇。
Useful Websites
i. myPortal
科大內聯網， 使用ITSC登入， 有各類科大網上服務 （Student centre、Course catalog、Student Time Table Assistant、Library Catalog、Canvas、Email等）
傳送門 （網頁）： https://itsc.hkust.edu.hk/myPortal
ii. Student Center
可以喺myPortal 搵倒，用黎：
(1) 睇，改個人資訊;
(2) My Finances(學費賬單等等);
(3) My Class Schedule / Class Enrollment (reg 科)；
(4) My Academic Records （course grade、 major requirement、 unofficial transcript 等）
當然需要用你嘅ITSC登入啦！
iii. Canvas
UST最主要嘅learning management system 。 可以喺myPortal 搵到， 主要用黎睇你reg 左嘅course 嘅lecture 同 tutorial notes， 某啲courses 會用呢個system 俾功課、 要求你交功課、 俾feedback 。 需要注意嘅係， 並唔係個個course 都係用呢個system ， 所以都係要睇番prof. send 黎嘅email 呀～
同樣需要ITSC登入架！
傳送門 （網頁）： https://canvas.ust.hk/
iv. Class & Quota
有得睇心水course嘅時間、code、quota等details，方便你喺student centre reg科！
傳送門 （網頁）： w5.ab.ust.hk
v. @Connect|O365
科大email，用你嘅itsc登入。所有有關科大嘅email都要喺呢入面睇。建議經常check email（最好一日一次啦），因為時不時都有重要嘅email send過黎，miss左就好大鍋架喇～
傳送門 （網頁）： https://o365.ust.hk/
vi. Student Computing & Printing Facilities webpage
由itsc提供各類打印服務、printing budget增值等，其中最方便嘅莫過於satellite printer service。
傳送門 （網頁）： https://itsc.ust.hk/services/academic-teaching-support/facilities/printing-facilities/print-budget-top-up
vii. 科大library webpage
提供查詢文獻 (database)、預約借書、預約learning commons & group study room等功能，book左房就唔洗擔心無地方開會啦！
溫馨提示，部分功能需要itsc Account登入。
傳送門 （網頁）： http://library.ust.hk/
viii. UST Space 科大社群
UST嘅網上論壇之一，主要用黎睇科大人對唔同course 嘅comments，作為一個參考；不過都係唔好盡信啦～
傳送門 （網頁）： https://ust.space/
ix. Pathadvisor
專門用黎喺UST咁大嘅範圍入面搵地方嘅～雖然操作上有少少困難，不過佢真係搵房嘅好幫得手架！
傳送門 （網頁）： http://pathadvisor.ust.hk/
Useful apps
i. USThing
好多科大同學必要嘅小幫手，佢會提你幾時上堂、Check Grade、搵工、Book library / LC房、Sport Hall、BBQ場等等，真係好方便架～
ii. HKUST ilearn
入面有canvas （參看上面）、SFQ同埋IPRS。SFQ係用黎做問卷用嘅；而IPRS係上堂互動答prof. 問題用嘅。
傳送門：
iii. m.hkust
一個綜合性嘅apps ， 有齊課室地圖、 新聞、 library 等功能。
傳送門 （Download link）：
http://m.ust.hk/info/
6.科大術語篇
入左科大，又點可以唔識科大術語呢？
i.Grade 神
指派grade派得多A/B range嘅教授。
ii. killer
同Grade神相反，指嘅係教授派嘅grade低過一般水平。例如overall分數低過mean少少就fail人。
iii. 摺&頹
摺嘅意思類似宅，指嘅係極少參加大學社交活動，整日自己一個做野。例如: 摺拉把即係成日喺拉把入面溫書；頹就等於無心機做野。
iv. LT
即係lecture theater（演講廳）嘅簡稱。
v. Skywalk
即係轉堂嗰陣兜課室而唔行concourse，搵出最快嘅路徑去目的地。
vi. Sor屎 & Freerider
Sor屎，即academic source，例如功課答案、notes 等等。
Freerider即係指group project入面唔做野但又坐享其成嘅groupmates 。
vii. 天地堂&走堂
天地堂指一日淨係得上晝下晝兩堂(或幾堂)，而中間隔左好好好長嘅時間無堂要上。
走堂即係指無上到嗰日要上嘅堂(特別指無合理原因下)。
viii. 過三爆四，SD，CGPA，TGPA，癲List
大學科科用grade黎計分，A+ = 4.3 grade point （GP） 、 A = 4 、 A- = 3.7 如此類推。 將你一個學期嘅Total Grade Points除嗰個學期嘅Total Credit就係你嗰個學期嘅TGPA；CGPA計法同TGPA一樣，但計曬所有學期嘅Grade 。
一個sem入面如果TGPA>3.7同無fail任何course就會入dean(癲) list。過三爆四即係GPA(多指TGPA) >3 or >4，形容極之優異嘅成績。
UST course派grade睇你overall mark嘅SD (standard deviation)。 例如，mean = B- / C+， 高mean 一個SD = B+ / A- / A 。
ix. 莊， 上莊， EXCO， SU， PIC
莊即校內學會， 組織等等嘅內閣。
上莊 (名詞) 指上一屆的學會內閣； 而上莊（動詞）即係自己參與候選內閣， 成為EXCO (幹事)。
SU = Student Union ， 即學生會。
PIC = 學會活動負責人。
x. 出pool
出pool即成功由單身（從來都未拍過拖 = A0）變為拍緊拖。
xi. Re- u
全名係reunion，即係一大班人喺參加完某個活動之後再約出黎聚會。
xii. 大學5件事
讀書、上莊、住宿舍、搵part-time、拍拖。